ဒေါက်တာတူးဂျာ ဦးဆောင်သော ကချင်ပြည်နယ်ဒီမိုကရေစီပါတီ (KSDP) စတင်တည်ထောင်

KSDP ပါတီမှ လာမည့် ၂၀၁၅ ရွေးကောက်ပွဲဝင်ရန် ပြင်ဆင်နေတဲ့ ဒေါက်တာတူးဂျာ။

လာမည့်ရွေးကောက်ပွဲအတွက် ကချင်ပြည်နယ်ကိုယ်စားပြုပါတီတခုအဖြစ်ရပ်တည်ကာ ပါဝင်နိုင်ရန် ဒေါက်တာ တူးဂျာဦးဆောင်၍ ကချင်ပြည်နယ်ဒီမိုကရေစီပါတီ Kachin State Democracy Party (KSDP) ကို တည်ထောင်လိုက်ပြီး ယခုအပတ်အတွင်း ရွေးကောက်ပွဲကော်မရှင်သို့ မှတ်ပုံတင်နိုင်ရန် ပြင်ဆင်နေပြီဖြစ်ကြောင်း ဒေါက်တာတူးဂျာက ပြောသည်။


“အခုတော့ ပါတီတခုဖြစ်မြောက်ဖို့အတွက် ပြင်ဆင်မှုတွေက အများစုပြီးစီးသွားပါပြီ။ ဆက်သွယ်မှုတွေကလည်း ပုံမှန်ရှိနေတော့ မကြာခင်ဖြစ်လာတော့မှာပါ။ လူ ၁၇ ယောက်လောက် စာရင်းထည့်သွင်းသွားမယ်။ ပါဝင်မဲ့သူတွေကို ဆုံးဖြတ်ပြီးရင် စာရင်းကိုကောင်းကောင်းချုပ်ပြီးမှပဲ ဖောင်ဖြည့်ပြီး တင်သွားကြမယ်ပေါ့။ ဆိုတော့ မှတ်ပုံတင်ကျတာနဲ့တော့ ရုံးတွေဖွင့်ပြီး လုပ်ငန်းစဖို့ ဆွေးနွေးထားကြပါတယ်။”

ကချင်လွတ်မြောက်ရေးအဖွဲ့ KIO မှ ထိပ်ပိုင်းခေါင်းဆောင်များဖြစ်သော ဒေါက်တာတူးဂျာ အပါအ၀င် ၆ ဦးတို့သည် ရွေးကောက်ပွဲဝင်ရန် အဖွဲ့မှနှုတ်ထွက်ကာ ကချင်ပြည်နယ်တိုးတက်ရေးပါတီ (KSPP) ကို တည်ထောင်ကာ ပါတီမဲဆွယ်စည်းရုံးမှုများအောင်မြင်မှုရရှိခဲ့သော်လည်း KIO အဖွဲ့မှအသွင်ကူးပြောင်းရေး လက်မခံခြင်းကြောင့်ဟုဆိုကာ ရွေးကောက်ပွဲကော်မရှင် ပယ်ချခြင်းကိုခံခဲ့ရသည်။

ထို့ကြောင့် ယခုအသစ်တဖန်ပြန်လည်တည်ထောင်လိုက်သော ကချင်ပြည်နယ်ဒီမိုကရေစီပါတီကိုမူ မည်သည့်အဖွဲ့အစည်းများနှင့် ပတ်သက်ဆက်နွယ်ခြင်းမရှိပဲ သီးသန့်လူထုပါဝင်၍တည်ထောင်လိုက်ခြင်းဖြစ်ပြီး ယခုတကြိမ်တွင်မူ ပါတီရမည်ဟုယုံကြည်ကြောင်း ပါတီဥက္ကဌဒေါက်တာတူးဂျာက ပြောသည်။

“ကျွန်တော်တို့ထင်တာကတော့ ဒီတကြိမ်ကတော့ လက်ခံမယ်လို့ယုံကြည်ပါတယ်။ ၂၀၁၀ မှာလည်း မပေး အခုလည်းမပေး တော့ မလုပ်လောက်ဘူးလို့ ကျွန်တော်တို့လည်း အခုက ရှင်းရှင်းလင်းလင်းနဲ့ ကျွန်တ်ာတို့လုပ်နေတာပါ။ ဟိုဘက်ဒီဖက်ဆက်နွယ်မှုမရှိဘူး။ နောက်ပြီး ရှင်းရှင်းလေးသဘောနဲ့ တရားဥပဒေကျူးလွန်တာမျိုးမရှိပဲ ကျွန်တော်တို့လုပ်ဆောင်တာဖြစ်တဲ့အတွက် သူတို့မပေးစရာအကြောင်း မရှိဘူးလို့ထင်တယ်။ တခြားလူမျိုးတွေကိုလည်း ပါတီတည်ထောင်ခွင့်ပေးတဲ့အတွက် ကျွန်တော်တို့ကိုလည်းပေးမယ်လို့ယုံကြည်တယ်။ ဒီတခါတော့ မပေးပဲတော့မနေကြဘူးလို့ ယုံကြည်ထားပါတယ်။ ဆိုတော့ ဒီတကြိမ်တော့ ရကိုရမယ်လို့ ယုံကြည်တယ်။”

ယခင်ပယ်ချခံပါတီထဲမှာ အဖွဲ့ဝင်ဟောင်းများလည်း အများစုအပါအ၀င် အဖွဲ့ဝင်အသစ်များပါဝင်မည်ဖြစ်ပြီး အဆိုပါတီသည် ကချင်ပြည်နယ်အတွက်ကိုယ်စားပြုနိုင်ငံရေးပါတီအဖြစ်ရပ်တည်ကာ ပြည်သူလူထု လိုအားသောမူဝါဒနှင့် ဥပဒေဘောင်အတွင်း လှုပ်ရှားသွားမည်ဖြစ်ကြောင်း ပါတီဥက္ကဌဒေါက်တာတူးဂျာ ဆက်ဆိုသည်။

“အားလုံးလည်းနာလည်ကြမယ်လို့ ယုံကြည်တယ်။ အဲဒါက ကျွန်တော်တို့လည်း အကောင်းဆုံး ပြည်သူလူထုတွေ နှစ်သက်တဲ့ ပေါ်လစီနဲ့သွားမှာဖြစ်တဲ့အတွက် ဘယ်သူ့နဲ့မှ ဆန့်ကျင်စရာမရှိဘူး။ ဒါကြောင့် ကျွန်တော်တို့ဖက်ကလည်း တတ်နိုင်သလောက် ကြိုးစားနေတာပဲဖြစ်တယ်။ ဆိုတော့ KIO ပဲဖြစ်ဖြစ် အစိုးရပဲဖြစ်ဖြစ် ကျွန်တော်တို့လုပ်ဆောင်မှုကို မမှန်မကန်ဘူးဆိုပြီးတော့ ယူဆပေးကြမှာ မဟုတ်ဘူးလို့ယုံကြည်တယ်။ အားလုံးနားလည်ပေးကြမယ်လို့ ယုံကြည်ပါတယ်။”

ပြီးခဲ့သည့်ဇူလိုင်လမှစ၍ ယင်းကချင်ပြည်နယ်ဒီမိုကရေစီပါတီတည်ထောင်နိုင်ရန် လူထုနှင့် အကြိမ်ကြိမ်ဆွေးနွေးကာ စတင်အကောင်ထည်ဖော်နိုင်ခြင်းဖြစ်ပြီး၊ ယခုလအတွင်း ပါတီမှတ်ပုံတင်ရရှိရေးကိစ္စဆောင်ရွက်နိုင်မည်ဖြစ်သည်ဟုဆိုသည်။ 

ပါတီတည်ထောင်လိုသူများတွင် ဒေါက်တာတူးဂျာဥက္ကဌဖြစ်ပြီး ဦးခေါဘောမ်က ဒုဥက္ကဌအနေဖြင့် ဦးဆောင်ကာ လူမျိုးဘာသာ မရွေး ပါဝင်လိုသူများကို ၁၅ ယောက်အနည်းဆုံးသတ်မှတ်ကာ ထည့်သွင်းသွားမည်ဖြစ်ကြောင်းသိရသည်။

ကချင်ပြည်နယ်တွင် လူထုအတွက်နိုင်ငံရေးပါတီတခုအဖြစ် တရားဝင်ရပ်တည်ရန်လိုအပ်နေသောကြောင့် နိုင်ငံရေးလုပ်ဆောင်လိုသော လူကြီး၊ လူငယ်ပိုင်များစည်းရုံးကာ ပါတီဖြစ်မြောက်ရေး စိတ်အားထက်သန်စွာဖြင့် အချိန်မှီတည်ထောင်နိုင်အောင် ပါဝင်ဆွေးနွေးခဲ့ကြကြောင်းသိရသည်။

www.kachinnews.com

www.burmese.kachinnews.com

www.kahcin.kachinnews.com

www.kachin-news.blogspot.com

http://www.facebook.com/Kachin-News-Group

Posted in: သတင်း